Pantun Pasambahan Menyambut Mempelai dalam Prosesi Adat Minang

Yth. Dunsanak Sekalian;

Cukup lama sudah saya menjalani profesi sebagai MC pernikahan Adat Minang di Ibukota Jakarta.
Sudah belasan tahun sejak dari 2005. Oleh karena itu saya ingin membagi ilmu bagi rekan-rekan atau adik-adik yang juga tertarik untuk belajar menjadi MC adat Minang, karena pendapatan dari MC juga sangat menjanjikan, he he...

Berikut ini adalah pantun adat Minang yang selalu aku pergunakan dalam penyambutan kedua mempelai (anak daro jo marapulai). Pantun-pantun dan pituah tersebut aku susun dari berbagai pantun yang sudah ada sejak dulunya di ranah Minang. Semoga bermanfaat.

PASAMBAHAN
PENYAMBUTAN MEMPELAI

DALAM RESEPSI ADAT MINANG

Lah tadanga suaro gandang, ditingkah dek si pupuik sarunai, tandonyo urang Minang baralek gadang, maarak anak daro jo marapulai.

Sairiang balam jo barabah, balam lalu barabah mandi. Sairiang salam jo sambah, sambah lalu salam kumbali.

Lah dilayangkan pandangan nan jauah, ditukiakkan pandangan dakek, dierengkan pulo pandangan sakuliliang, suok jo kida, lah tibo bana rasonyo di nan patuik, patuik lah nyato manuruik alua.

Dibulekkan aia ka pambuluah, di bulekkan kato jo mufakaik. Jikok bulek nyo kini lah dapek digoloangkan, jikok picak nyo lah dapek kito layangkan. Hari rancak kutiko baiak, bungo nan sadang kambang, maso nan sadang manyalasai, kapa balayia hanyo lai.

Buah cubadak di tangah laman, dapek dijuluak jo ampu kaki, usah lamo tagak di halaman, ambiak cibuak basuah lah kaki.

***

Mano lah sagalo niniak ko mamak; cadiak pandai, alim ulama, suluah bendang dalam nagari. Nan gadang basa batuah, nan bapucuak sabana bulek kok baurek sabana tunggang, tingginyo tampak jauah, gadangnyo jolong basuo, kapai tampek batanyo ka pulang tampaik babarito.

Capek kaki ringan tangan, capek kaki indak panaruang ringan tangan indak pamacah, arih bijaksano, tau jo ereang gendeang, alua jo patuik, raso jo pariso, pamaga adaik jo limbago. Nan dianjuang tinggi dihamba gadang, ditinggikan sarantiang didahulukan salangkah, padoman anak ko kamanakan, tampek batenggang dek urang kampuang.

Sarato bundo kanduang kami, limpapeh rumah nan gadang, ubek jariah palarai damam, sumarak anjuang di ranah Minang. Lapa nan tampek mintak nasi, auih nan tampek mintak minum, amban puruak aluang bunian, pusek jalo kumpulan tali, hiasan dunia jo akhiraik, payuang panji ka sarugo.

Ketek kok indak kami sabuikkan namo gadang kok indak bahimbaukan gala, indak babarih jo ba balabeh, indak babateh sarato bahinggo, indak pulo nyo basisiah jo basibak, salam jo sambah kami tatumpak bakeh dunsanak kasadonyo.

***

Tanam siriah tanam lah pinang. Tanam lah pulo si karakok di halaman. Cabiak siriah, gatok lah pinang, iyo baitu hati kami mangku sanang.

Siriah nan sahalai iyo mintak dicabiak, kok pinang sabuah mintak digagok, sarato sadah nan mintak dipaluik, bia manih taraso diujuang lidah, paik nyo nak turun ka rangkuangan, mambayang ka muko, baitu bana sanangnyo hati kami, sajuak dalam kiro-kiro. Manyongsong marapulai jo anak daro, ayah jo bundo, niniak jo mamak, adiak jo kakak, cukuik rombongan kasadonyo. Kok kurang laweh lah si tapak tangan, jo nyiru kami tampuangkan. Baitu bana nyo dunsanak kasadonyo.

***

Ranah Minang, baranah jo batapian, ba sawah jo nan baladang, bakoroang jo bakampuang, basurau jo bamusajik, bapandam jo bapakuburan, ba malin jo bapangulu, ba adaik jo ba limbago.

Adaik basandi syarak, syarak basandi ka Kitabullah, syarak mangato adaik mamakai, baitu kito di Minangkabau sajak saisuak, sampai kini bapakai juo.

Kaluak paku kacang balimbiang, tampuruang lenggang lenggokkan, baok manurun ka saruaso. Anak dipangku kamanakan di bimbiang, urang kampuang dipatenggangkan, jago adaik jan sampai binaso.

Ramo ramo tabang malayang, hinggok nyo di ateh buah palo. Lamo bana kito di rantau urang, adaik jo limbago jan sampai lupo.

Bara lah tinggi si bangau tabang, nan pulangnyo ka kubangan juo. Rami bana budayo datang, budayo kito kambangkan juo.

***

Salamaik datang anak daro jo marapulai, ayah jo bundo, sarato rombongan kasadonyo. Jikok nan diama alah pacah, nan dimungkasuik alah sampai, nan dinanti-nanti alah tibo nan dijapuik alah pulo tabao, anak daro jo marapulai.

Anak daro nan rancak banamo ...

Anak dari ...

Marapulai nan gagah banamo ...

Anak dari ...

Anak daro jo marapulai, sarato ayah jo bundo kami persilahkan naik ke atas panggung pelaminan.

Bagaimana menurut Anda pantun dan pepatah-petitih yang aku susun di atas? Apakah menurut Anda masih perlu ditambah atau dikurangi agar lebih baik? Mohon komentarnya ya.

Salam,

Wady Afriadi